Platform sov nou sosyete

Pou enn meyer sosyete

PLATFORM Sov NOU SOSYETE 

Platform sov nou sosyete ki regroup bann lorganizasyon sosyal ek syndical ki panse ki nou sosyete pe fer fas  boukou difilkilte e ki parmi sa bann difikilte la enan boukou ki  kapav rezoud si gouvernman rezyonal pran bann desizyon ki bizin ek rektifye bann move desizyon ki li  finn pran dan lepase  e ki an mem tan li pran enn direrksyon ki pou amenn progre ek prosperite dan nou sosyete. 

Li osi importan pou ki nou sosyete fonksyonn kuman bizin ki  demokrasi respekte e ki liberte lipinyon respekte. 

Dan sa kontex la platform sov nou sosyete pe soumet so bann revandikasyon ek kritik pou enn meyer sosyete kot fer bon viv ,kot boukou nou bann soufrans ek difikilte pou truv enn lizur a kondisyon biensir ki Gouvernman Rezyonal  pran an konsiderasyon nou bann revandikasyon . 

Platform sov nou sosyete pou kontiyn milite tank ki so bann revandikasyon  pa gayn konsiderasyon ki bizin parski nou konvainki ki Gouvernman Rezyonal enan moyen ek puvwar  pou  regle boukou bann difikilte ki nou sosyete pe fer fas zordi.. 

Kifer nou pe adress nou bann revandikasyon a sef komiser ?  limem ki  a latet Gouvernman Rezyonal et ki bokou nou bann revandikasyon li truv so explikasyon dan bann move desizyon ki li ek so Gouvernman finn pran ,par fason ki li finn azir an tan ki sef komiser  ek osi par bann desizyon ki li ti sipoze pran dan lintere nou sosyete me ki li pa finn pran. 

 

Nou bann revandikasyon ek kritik enan enn sel lobzektif se amenn nu kontribisyon pou ki nou sosyete al ver progre ek prosperite dan enn lanvironnman kot penan intimidasyon,laper,viktimizasyon,arselman ek larogans, enn sosyete kot fer bon viv kot demokrasi  ek liberte lopinyon ek liberte panse respecte,kot tou Rodriguais santi li enan mem drwa , ,kot so lopinyon ou so lapartenans politik respekte,kot le boner pep Rodriguais  dan so lansamb vinn sel lobzektif Guvernman Rezyonal ki o puvwar. 

 

 

Nou bann revandikasyon ek kritik 

 

1.Demokrasi ,drwa a la diferans ek liberte lopinyon 

 

Enn bann gran difikilte e kapav mem lasurs boukou nou bann revandikasyon se fason ki Gouvernman Rezyonal avek sef komiser a latet azir  pou diriz Rodrigues  Regional Assembly  ek inplemant zot bann policy,tou dimoune kone ki zot enan enn manda demokratik pou diriz Rodrig, me dimoune an mem tan atann ki sa fer dan enn kad demokratik ek dan lintere lepep.Si Gouvernman ki o puvwar panse ki li pe azir dan lintere lepep li pa ena okenn rezon pou anpes dimoune donn zot lopinion  lor bann mezir ki zot pe deside ubyin anpess  dimoune exprim zot bann diferans ek kritik lor seki sipoze pe deside ek fer dan zot lintere. 

Nou konsidere ki Guvernman Rezyonal pe rod inpoz so bann reform ek lezot bann desizyon san ki personn enan drwa exprim enn lopinyon kontrer ubyin exers zot drwa pu kritike.Li paret ki Guvernman rezyonal de par so fason azir enan enn lot definisyon demokrasi ,zot kwar ki seki zot panse li otomatikman bon e ki seki lezot panse li otomatikman pa bon ,zot pa siport okenn kritik mem si kritik la viz a amenn enn refleksyon ki al dan lintere Rodrig.Zot pa mem dakor ek enn form konsiltasyon ki permet dimoune exprim zot lopinion lor seki sipoze pe fer dan zot lintere. 

Enan bokou bann gran desizyon  ki pou enan enn lefe direk lor lavi dimoune ki pe viv dan Rodrig ki finn pran e ki pe kontiyn pran san ki lepep enan so mo a dir.Dan enn vre demokrasi popilasyon bizin enan so mo a dir lor bann desizyon ki pe pran e ki pou afekte so lavi ,lerla desizyon la gayn lezitimite ek soutien lepep.Zordi zur tou bann gran desizyon ki pe pran pe inpoz kareman lor popilasyon ek tou tantativ depi bann reprezantan lorganizasyon syndical ek sosyal ki oze intervenir pe truv zot victimize ,arsele ,insilte ,menase ek terrorize par bann tenan puvwar. 

Se pou sa rezon la ki nou pe dir ki nou sosyete pe baskil dan enn diktatir ,kot nou santi   enan enn klima laper  ki pe instale atraver bann menas ,bann santaz,bann intimidasyonek bann viktimizasyon. 

Zordi zour tou bann gran reform kip e amene dan Rodrig ki li lor zafer peser ek proteksyon lagon ,ki lo lor reform dan nou fonksyon piblik, ki li lor reform dan delo tou sala pe fer par inpozisyon, ou dakor ou pa dakor nu pe inpoze,lidan lintere Rodrig ek so popilasyon ou pa nou pe inpoze,reform la viab ou pa nou pe inpoze,popilasyon ki gagnan ou perdan nou pe inpoze,nou enan rezon nou enan tor nou pe inpoze.Li kouman dir pe dir lepep seki to panse ek seki to kwar pa inportan seki ki nou deside ek nou  inpoze ki  bizin aksepte on dire ki kan mazorite dimoune finn met sa guvernman la o puvwar zot pe regne zot  drwa pou exprim zot ubyin  finn donn zot puvwar pou konfiske zot drwa ,zot liberte  panse ,pou reflesi ek pou exers zo liberte pou exprim zot lopinyon. 

Nou konvainki ki demokrasi dan so vre sans vital pou enn bon fonksyonnman nou sosyete, li inportan parski li permet dimoune ki pe viv dan sosyete la exprim li lor bann desizyon ki pe pran et ki pou enan enn linpak direk lor so lavi ,li inportan  usi pou permet ki bann desizyon ki pe pran gayn enn lezitimite parmi la popilasyon,ki popilasyon ader a bann reform la ek gayn  zot sipor  pou amenn bann sanzman ki pou inflyans zot  lavi. 

Platform sov nou sosyete ek bann lorganizasyon ki form parti sa platform la penan pretansyon pou dir ki tou seki li pe propose li enan rezon me li konvainki  ki dan diskisyon ,dan deba ek a traver bann vre konsiltasyon kapav degaz seki  meyer pou nou pei an term devlopman ,reform ek policy ki bizin inplemante. Li osi inportan pou  degaz enn vre konsansis lor ki kalite reform bizin amene dan lintere popilasyon ek an mem tan gayn sutyin popilasyon pou so inplemantasyon . 

Si Gouvernman Rezyonal panse ki  bann desizyon ki  li pe pran li korek ek li pe fer dan lintere popilasyon ,kifer li pa permet popilasyon exprim li lor la? 

Lotonomi Rodrig li enn elarzisman lespas demokratik dan Repiblik ,kot pe permet dimoune dan Rodrig pran sertenn desizyon lor sertenn bann zafer ki konsern zot lavi me pou ki sa pran form dan la pratik, bizin enan enn aprofondisman lespas demokratik dan Rodrig mem pou  permet popilasyon servi sa proximite ki lotonomi finn permet la pou partisip plis aktivman dan bann priz de desizyon ki pou enan enn linpak lor so lavi dan enn fason ou enn lot. 

Lotonomi pa fer sans si sa transfer puvwar depi moris  a enn Gouvernman Rezyonal mem avek sertenn limit pa an mem tan permet elarzisman lespas demokratik dan Rodrig mem .Dan plas enn elarzisman lespas demokratik nu pe truv enn restriksyon lor sa tigit liberte ki nou enan la.Liberte pou exprim nou lopinyon menase ,lberte syndical menase,liberte pou exprim nou lor bann desizyon ki pou enan enn linpak lor nou lavi ek nou sosyete menase, demokrasi partisipativ rezim a enn obligasyon donn ou lakor lor seki fini deside san okenn konsiltasyon. 

Li pa normal diriz enn pep par laper, par teroriz dimoune ,par menas ,par konplo ,par konspirasyon , par santaz,par viktimizasyon ek la haine.se pou sa ki platform sov nou sosyete pou kontiyn so lalit tank ki demokrasi pa respekte,tank ki Gouvernman Rezyonal pa aret  bafoue bann drwa fondamental bann sitwayin nou pei. 

Nou persiste pou kwar ki boukou progre nou sosyete kapav fer si demokrasi respekte dan Rodrig.Nou zame pou permet ki Rodrig baskil dan enn diktatir,nou zame pou permet ki  Guvernman Rezyonal servi so puvwar kontlintere lepep. 

Nou demann li byin sinp ,Sef komiser ek Guvernman Rezyonal bizin aret bafoue bann drwa demokratik popilasyon, li bizin exers so puvwar dan enn kad demokratik ek dan lintere lepep si sirtou li anvi gayn kolaborasyon ek sutyin popilasyon.Guvernman Rezyonal bizin met enn frin a tou  bann azisman anti demokratik ki friz la diktatir. 

  

2.Demantelman servis piblik ek latak kont servis piblik ek fonksyoner. 

Si enan enn zafer ki esansyel ek primordial pou bon fonksyonnman nou sosyete kot penan enn sekter prive solid se lexistans servis piblik. popilasyon Rodrig depann bokou lor servis piblik inikman parfwa pou bann zafer osi primordial kuman lasante.si nou system lasante pa fonksyonn kuman bizin se popilasyon ki pou soufer.Au lieu ki sef komiser ek so guvernman pran bann mezir ki bizin  pou ranforsi fonksyon piblik zot fer lekontrer ,zot fer tou pou demantel servis piblik ek amors enn latak san presedan kont bann fonksyoner kipe roul sa servis piblik la ek kont bann syndikalis ki pe defann  so demantelman .sa Destriksyon ek demantelman nou fonksyon piblik pe fer dan plizyer fason par sef komiser ek Gouvernman Rezyonal; 

A.Enan plis ki 1500 pos travay ki vakan dan fonksyon piblik valer di zur, sa li a diferan nivo responsabilite.li enn krim dan enn sosyete kot penan enan enn  gro problem somaz  ,kot penan enn sekter prive ki kapav kre lanplwa ki  pa pe ranpli bann pos ki vakan ek pa pe kre okenn nuvo job ,sirtou  dan enn sitiasyon kot tou dimoune kone ki enan enn mank maindev zeneral dan tou sekter fonksyon piblik e sa pe rezite dan inkapasite bann diferan servis  pou ranpli zot rol kuman bizin . 

Sa sitiasyon la pe  antrenn enn stress permanan lor sa detrwa fonksyoner ki reste pou akonplir travay ki zot sipoze fer ek anplis akonplir travay ki 2,3 dimoune ti sipoze fer pou fer servis la marse kuman zot dir zot mem . 

Enan buku fonksyoner ki pa kapav zwir zot bann konze parski penan ranplasan,parski enan enn mank krisyal fonksyoner a diferan nivo  e sa pa permet enn bon fonksyonnman servis  piblik dan sa sitiasyon la se popilasyon ki sufer .Enan bokou fonksyoner ki pe fer plis ki seki zot sipoze fer dapre zot scheme of service, zot pe oblize fer higher duties san renimerasyon aproprie.Dan sa kontex la enan bukou presyon ki exerse lor bann fonksyoner pou zot ravay kuman esklav.Si sa sityasyon la kontinye nou pe al ver enn disfonksyonnman total nou fonksyon piblik ek li pou colapse net ek nou sosyete ansam. 

B.PRB finn fer buku rekomandasyon pou permet nou fonsyon piblik fonksyonn pli efikasman ,parmi enan kreasyon bann nuvo grade,bann nuvo pos responsabilite, bann nuvo striktir pou permet enn meyer fonksyonnman .Finn enan usi bann rekomandasyon pou permet ki sevis piblik dan Rodrig gayn staff apropriye a diferan eselon pou so bon fonksyonnman a traver  rekomandasyon pou enn manpower assessment servis piblik dan Rodrig. 

An  lien avek sa  de [2 ] prinsipal rekomandasyon la PRB finn osi rekomande ki bizin inplemant Personal manangement system pou ziz performans bann fonksyoner. 

Sa  de {2} premye rekomandasyon la pa finn inplement ziska ler,bann pos ki PRB finn rekomande pou kre avek konsantman R.R.A  pankor inplement,pa finn fer provizyon dan bidze pou implement zot malgre ki guvernman inn aksepte pou implement rapor PRB in toto.Malgre sa,  Guvernman rezyonal truv li normal pou fer tou pou impoz  personal managemnent system lor fonksyoner ki travay sou R.R.A. 

Kuman kapav ziz performans enn fonksyon piblik ki tou dimoune kone li an pann?.kuman pu ziz performans bann fonksyoner ki pe fer bann travay ki penan narnyin a fer ek zot scheme of duties ek ki pe bizin fer travay ki 4,5 fonksyoner ti sipoze fer?kuman bann fonksyoner kapav performan si zot penan mwayin an term personel ek lekipman pou fer li .?kan travay pa marse Gouvernman Rezyonal zet blam lor fonksyoner,  zot fer kwar ki fonksyoner ki paress ki inkonpetan ,ki pa fer zot travay kuman bizin.Samem bann  pretex zot servi pou kre bann konpanyi bidon pou soidizan enan plis lefikasite. 

C.Guvernman Rezyonal pa truv nesesite kreasyon departman pou okip sekter touris malgre ki P.R.B finn fer bann rekomandasyon ki al dan sa sans la ek  finn rekomand kreasyon plizyer pos ki pankor ranpli ziska ler .Guvernman Rezyonal prefer konsantre lor konpanyi Discovery Rodrigues pou okip sekter turis o detriman  fonksyon piblik. 

Nou truv osi lexamp  komisyon Youth and Sport ki olye rekrit sofer kot enan bokou pos ki vakan ,olye aste bann vehikil nef malgre ki komisyon la enan moyen pou fer li 

 

,zot prefer contract out servis ki zot ti pe ofer pou vehikil bann atlet apre lantrennman  a bann kontrakter prive o detriman enn amelyorasyon servis ki zot ti pe deza ofer. 

 

 Par zot azisman nou kapav afirme ki Gouvernman Rezyonal an plas pa kwar dan la fonksyon piblik, zot konsidere ki enan tro rizidite dan fonksyonnman fonksyon piblik, zot anvi enan enn mainmiz total lor fonksyon piblik dan Rodrig ,alor zot azir dan plizyer fason pou zot atenn zot lobzektif  . zot azisman  montre zot lintansyon pou fini enn fwa pou tou avek fonksyon piblik e an mem tan zot demontre ki zot lintere se pa enn fonksyon piblik ki kapav akonplir so misyon pou bien etre la popilasyon , me enn fonksyon piblik ki azenou devan zot ek a zot servis o lieu o servis de la popilasyon. 

1.Zot pa pran okenn desizyon politik ou administratif pou donn mwayin ki bizin, ki li an term maindev ,finans ,striktir aproprye,lekipman a  bann diferan departman ki ofer enn servis a la popilasyon pou permet zot fonsyonn  efikasman . 

zot azir dan enn fason ki permet sityasyon deteriore , pu ki  ler popilasyon kumans amerde avek rezon, kuman dan ka water unit lerla zot vinn avek zot plan privatizasyon degize swadizan sel fason pou fer servis la vinn pli efikas Dan realite li  zis pou zot gayn plis control politik  ek lamain lib  lor zesyon delo parski  zesyon konpanyi pa rizid kuman fonksyon piblik .Se enn fason degize pou detrir fonksyon piblik dan Rodrig et sa kalite  politik la  pe repete dan buku sekter. 

2 Zot amors enn latak terib ek san presedan kont tou bann fonksyoner ek bann syndikalis ki defann  fonksyon piblik et ki milit pou enn fonksyon piblik ki efikas e  ki enan moyen pou zwe so rol dan sosyete Rodrig , ki kapav ofer enn servis ki reponn a aspirasyon popilasyon. 

Zot fer bann deklaryon piblik  avek sel lobzektif , kre enn klima laper parmi bann fonksyoner ,pou  ki zot enan lamain lib pou detrir fonksyon pilbilk ek redwir de trwa fonksyoner ki reste la an bann esklav a zot servis. Imilyasyon,arselman ,diskriminasyon,viktimizasyon inn vinn mark de fabric sef komiser ek sertin so bann komiser. 

.Zot deform bann provizyon R.R.A act oubyin donn li bann nuvo definisyon pou permet zot enan enn reigne san partaz lor servis piblik dan Rodrig.Zot evins bann fonksyoner konpetan pou ranplas zot par bann marionette a zot servis afin ki zot kapav permet zot fer lapli et le bo tan . 

3.Zot donn enn nuvo interpretasyon seksyon 38 R.R.A act pou ki zot kapav akapar puvwar Island Chief Executive ek bann Departmental Head pou permet zot enan enn control total lor zesyon kotidyin servis pilik dan Rodrig. Sertin  kuman  I.C.E Pierre Louis finn truv li retrograde par lord Sef Komiser ek ranplase par enn vre marionette an la person de  D.H Mattan, ki pa konpran narnyin dan zesyon Servis Piblik et ki donn bann fonksyoner fos linstriksyon ki kontrer a bann reglemam etabli dan fonksyon piblik ek li intimid bann syndikalis, zis pou satisfer Sef komiser ek so Guvernman Rezyonal . 

Nou bann revandikasyon dan sa kontex la li byin kler; 

a.Sef Komiser ek so Guvernman Rezyonal bizin enn fwa pou tou abandonn zot politik ek azisman ki al dan direksyon enn destriksyon total servis piblik dan Rodrig ek adopte enn nuvo lapros ek enn nuvo politik ki pou redonn so let de nobless a servis piblik dan Rodrig ek an mem tan donn servis piblik mwayin pou li kapav akonplir so misyon dan lintere popilasyon ek pei. 

b.Bizin met enn frin a inzerans politisyin ,ki li sef komiser ou lezot komiser ou politisyin dan zesyon kotidyin servis piblik dan Rodrig. 

cBizin ferm tou sa bann konpanyi ki finn kre avek sel lobzektif afebli servis piblik ek transfer zot lefektif ek lekipman a bann sekter servis piblik apropriye. 

d.Bizin ranpli tou bann pos vakan (mem si bizin restyle sertin ladan ] pou permet servis piblik la fonksyonn  dan enn fason efikas. 

e.Bizin permet  titiler bann pos kuman I.C.E ek D.H azir an tut indepandans dapre bann provizyon R.R.A act dan desarz zot responsabilite a la tet servis piblik dan Rodrig. 

f.Bizin met enn frin a arselman ek tou form viktimizasyon ki bann fonksyoner ek bann syndikalis dan servis piblik victim dan akonplisman zot responsabilite. 

g.bizin zel inplemantasyon personal manangement system tank ki pa finn fer lexersis manpower assessment ek implement lezot rekomandasyon P.R.B ki enan enn lyin direk avek inplemantasyon P.M.S. 

h.Bizin ranpli tou bann pos ki P.R.B inn rekomande. 

i.Bizin arête avek zis nosyon travay prodiktifki ki tusel pa fer sans dan kontex Rodrig ,bizin pans usi an term travay itil ki pli fer sans . 

j.Bizin aret contract out bann servis ki servis piblik normalman enan labitid ofer. 

k.Bizin rezilye kontra D.H Mattan ki pe azir kuman I.C.E ,ki finn donn bann fos linstriksyon fonksyoner, linstriksyon ki ti kapav enan bann reperkisyon byin grav  dan fonksyonnman servis piblik dan Rodrig ek so ranplasman par kikenn ki enan konpetans ek lindependans{pa enn lot marionette} ki pou kapav redonn dignite bann fonksyoner ek redonn enn nuvo limaz servis piblik dan Rodrig.Pu respekte lespri lotonomi nou ti pou swete ki li enn Rodriguais ki enan konpetans ki okip sa fonksyon la. 

 

DELO 

Enn de pli gran lexamp azisman anti demokratik ,danzere ,kont lintere popilasyon ek ki al dan direksyon pou detrir servis piblik par  Sef Komiser ek so Guvernman se privatizasyon degize zesyon ek distribisyon delo dan Rodrig .Li enn ak immoral ek anti demokratik parski li finn fer san konsantman popilasyon malgre tou seki zot pe dir pou zistifye lekontrer.Pou Sef komiser ek so Guvernman Rezyonal konsantman popilasyon vedir enn 2 laliyn dan enn program electoral plis ki 8 an desela ki a lepok pa finn gayn sutyin mazorite dimunn dan Rodrig plis enn paragaf dan enn diskur ki sef komiser ti fer dan Lasanble Rezyonal, demokrasi partisipativ rezim  a invit bann reprezantan sosyete sivil  pou vinn ekut Sef komiser inform zot  desizyon ki  li fini pran et ki manyer li pou aplik li.Nou enan bokou interogasyon lor rezon ek fason ki finn azir pou inpoz Rodrigues Water Company ; 

a.Si desizyon la pe pran dan lintere popilasyon kifer Sef komiser pa dakor ki sosyete sivil ek popilasyon donn zot lopinyon lor la? 

b. kifer dan kanpayn electoral zot pa vinn dir dimunn kare kare ki zot vre lintansyon setadir ki zot pou fer paye delo , zot pou demantel Water Unit ek zot pou  kre konpayni ki andeor control Lasanble Rezyonal e ki konpanyi pa pou investi dan delo  pou permet  enn amelyorasyon kantite ek kalite delo me sinipleman pou zer tigit delo ki enan ek fer nou paye pou sa .? 

Zot rod  fer nou kwar ki zot pa pou fer paye delo me servis ,nou pa osi bet pou kwar ki servis ki pou paye me pa delo .infrastriktir delo existan fini paye depi lontan .Nu kone ki sa dilo ki gagne la li vinn depi lapli ki tom lor Rodrig et sa lapli la li pa propriete lasanble rezyonal ou sef komiser. 

Li osi kler ki Sef komiser ek so Guvernman Rezyonal pa finn pran na konsiderasyon, kontribisyon delo gratis dan sosyete Rodrig ki li an term kalite lavi oubyin nivo de vi bann Rodriguais sinon li pa ti pou pran enn tel desizyon .li osi kler ki Sef Komiser ek so Guvernman pa realiz linpak negatif ki sa desizyon la pou enan lor kalite ek nivo de vi bann Rodriguais . 

Apar lefet ki sa desizyon la finn pran dan enn fason antidemokratik ek par enn manipilasyon ontez lopinon piblik dan Rodrig nou enan lezot rezon pou exprim nou dezakor ek Gouvernman Rezyonal lor sa size ,par examp; 

1.delo se lavi ,akse gratis a delo finn permet popilasyon Rodrig gard enn nivo ek enn kalite lavi remarkab, malgre lamizer, bann maladi ki existe dan lezot pei kot enan lamizer kot enan difikilte gayn akse a delo  preske inexistan kot nou akoz isi tou dimoune gayn akse gratwitman a delo mem si an term kantite ek kalite li pa san repros.Avek desizyon guvernman rezyonal sa pou nepli le ka parski zis dimoune ki enan kapasite paye ki pou gayn akse a delo. 

2.Tou bann rapor pe dir ki enn gran mazorite dimoune pe viv dan lamizer sa bann dimoune la pou inkapad paye delo ,zot pou inkapad servi delo selon zot besoin et sa pou enan bann reperkisyon negativ terib lor zot lasante, lizyenn ,zot kalite ek zot nivo de vi. 

3. Tou dimoune dakor ki bizin enan enn amelyorasyon dan kantite ek kalite delo ki distribiye dan Rodrig,me dimoune osi rekonet ki se rezilta politik guvernman rezyonal ki pa finn pran bann mezir ki bizin tan politik ki administrative  pou permet enn amelyorasyon sa sitiasyon la et ki finn fer lekontrer pou ki Water Unit  kolaps pou ki dimoune revolte lerla zot kapav inpoz zot politik privatizasyon. Tou dimoune kone ki konpanyi delo pa pou investi enn sou  pou amelyor kantite ek kalite delo ki pou distribye,me ou pou enan pou paye pou tigit ki ou gagne la.. 

4.Larzan ki guvernman investi dan delo pou asir enn akse gratis delo a tou dimoune kapav samem larzan le mieux itilize et sa investisman la pa kapav konsidere kuman enn asistans paternalis ubyin enn ponksyon paraziter lekonomi. 

5.Kan nou get investisman ki pe finn fer dan Rodrigues Water Company avek larzan ki finn earmark pou Water Unit nou sir ki si sa mem investisman ti fer dan Water Unit ti pou enan enn bel amelyorasyon dan management ,ek distribisyon delo san ki sekter la sap sou control R.R.A et san ki bizin paye pou sa. 

6.Zesyon delo par Rodrigues Water Company li buku mwins transparan ki Zesyon par Water Unit.kan zesyon delo kit servis Guvernman pou al dan konpayni li sap otomatikman sou control popilasyon enan zis enn ti poigne dimoune ki kone ki pe pase exakteman .Mem kan ou enan enn problem delo dan ou landrwa sa dimoune ki ou finn vote pou soidizan intervenir kan enan sa kalite problem la pa pou kapav fer narnyin pou ou zot zis pou dir ou ki konpanyi ki okip delo aster et ki zot pa kapav met nene dan zafer konpanyi ,ala bann dimoune ki ou finn donn puvwar  pou okip ou bann problem , zot finn transfer sa puvwar la enn ti group dimoune ki ou pa finn vote ki pa pran an konsiderasyon drwa ek bezwin popilasyon zot get zis lapse ekonomik {profi}ek lapse teknik.Enan osi enn lapse ki nou kapav kalifye  kom etan kan nou get lyin ki enan ant bann dimunn ki pe okip R.W.C ek Water Unit ,chairman konpanyi limem Departmental Head Water Unit ,Sef komiser limem a ki R.W.C rann kont limem ki political head Water Unit.sa sitiasyon la poz bokou interogasyon lor fonksyonnman sa de {2} antite diferan la. 

7.Dan konpanyi sekerite lanplwa li preske inexistan ,nu pa kapav dir ki travay dan konpanyi li travay dirab .travayer dan konpanyi enan mwins drwa ki travayer dan sekter piblik .avek nuvo lalwa travay byin fasil travayer dan konpanyi perdi zot travay. 

8.Akse a delo li enn drwa fondamantal ,enn drwa imin, si fer delo vinn enn komodite kot zis seki kapav paye pou gayn akse alor akse  delo ki nou kapav konsidere kuman akse a lavi parski nou tou kone ki delo se lavi nepli enn drwa alor nu kapav dir ki seki guvernman rezyonal ek Sef Komiser pe fer la li pe remet an kestyon nou drwa a lavi et sa li inkonpreansib. 

9.Rodrigues Water Company pa pou prodwir ni enn gout delo apar  lapli ki tom depi lesyel,li pa pou desalinn delo,li pa pou ranz rezervwar apar seki Water Unit ti pe deza fer lor sa plan la R.W.C pou zis lir konter ek fer ou paye.Samem zot apel swadizan moderniz zesyon ek distribisyon delo , nou dir ki sa pou rann popilasyon pli mizer, parski kan pou bizin paye delo sa pou met restriksyon lor dimoune mizer pou servi delo pou fer ti plantasyon ek nuri zanimo, sa pou osi afekte kalite lavi parski pou enan restriksyon lor kantite delo pou servi pou antretenir enn bon lizyenn.Vire tourne , a la fin li vinn kler ki a lonterm si delo kontiyn rule par guvernman et ki li ress piblik ek gratis li pli ekonomik ki seki Guvernman Rezyonal pe  inpoz lor  popilasyon . 

10.Kan nou konsider tousala et kan nou get bann rezon bankal  ki pa fer  okenn sans ,ki pe  avanse par Guvernman Rezyonal ,nou kapav dir ki si dan tou sala si zot ti enan enn tigit respe pou sa popilasyon ki finn fer zot konfians la et si zot ti vreman pe rod fer kitsoz dan lintere pei ek dan lintere popilasyon, zot ti bizin o mwin enan desans pou ouver konsiltasyon avek popilasyon pou gete ki meyer opsyon ki enan pou amen enn amelyorasyon dan zesyon,dan kantitie ek kalite delo ki distribye a sa popilasyon la, sirtou ki nou tou kone rezilta katastrofik sa kalite reform ki zot pe amene la inn enan dan buku lezot pei ek ki enan lezot bann alternativ ki finn fer zot prev dan lezot pei sirtou kot inn met popilasyon a kontribisyon. 

Desizyon Guvernman Rezyonal li paret al kont kuran kan nu truve ki enan pei pe amand zot konstitisyon pou anpes privatizasyon delo ,enan pe adopte seki apel blue constitution pou donn delo plas ki li merit ek boukou lezot pe abandonn sa kalite politik la ek pe retourn zesyon delo sou control guvernman . 

Nu dir ki nou bann dirizan pa kapav plis royalis ki lerwa amwin ki zot enan enn hidden agenda ki popilasyon pankor dekuver, sirtou wi sirtou ki nou poz nou la kestyon kifer lopsyon ki pli simp ek pli kretib ek viab setadir enn amelyorasyon Water Unit par donn li moyen neseser pou li fonksyonn kuman bizin pa finn pran an konsiderasyon ditou.,a la fin kestyon la li ress ,ki R.W.C kapav fer ki Water Unit pa kapav fer ? 

 

Nou revandikasyon li byin simp ek kler ; si Guvernman Rezyonal  pe vreman get lintere popilasyon dan sa demars la ,nou demann li avan tro tar ferm Rodrigues Water Company tutswit ek transfer tou so bann asset ki finn aste ek larzan guvernman  ek bann travayer ki deza pe paye avek larzan guvernman a Water Unit ek an mem tan  anklans enn vre konsiltasyon avek popilasyon avek kom lobzektif enn ameltorasyon dan zesyon ,kalite ek kantite delo ki distribye san remet an kestyon akse gratis tou dimoune a delo.o ka kontrer platform sov nou sosyete pou aksantye so kanpayn kont sa desizyon immoral ,antidemokratik ek ki al kont lintere Rodrig ek so popilasyon. 

 

Somaz,lamizer ek lanplwa 

 

Si enan enn fleo ki pe afekte Rodrig depi bokou banane et ki pe anpire sa bann dernye lane la se fleo lamizer ek somaz.Malgre tou bann promes ek bann mezir ki sipoze pe pran pou truv enn solisyon dirab a sa de problem mazer la, nu pe konstate ki olye amelyorasyon enan enn deteriorasyon  inkietan sitiasyon somaz ek lamizer dan Rodrig 

Nou bien dakor ki gouvernman santral enan enn gran par responsabilite devan sa sitiasyon la , nou rekonet osi ki Guvernman presedan enan so par responsabilite ,me nou konsidere osi ki Guvernman Rezyonal kip e diriz pei zordi  enan so par responsabilite ki li bizin asime . 

Nou konsidere ki Guvernman Rezyonal pa finn servi diferan bidze ki li finn gagne pou atak dan enn fason dirab sa de problem grav la.li finn adopte enn politik ekonomik ki pa lye devlopman evek kreasyon lanplwa et ki mem parfwa swadizan devlopman la  pe fer o detriman kreasyon danplwa dirab,finn adopte enn politik ekonomik ki konsis a donn sarite dimoune ki byin mizer ek donn enn de travay bat bate dan plas bann vre travay dirab.Enn gran parti bidze capital R.R.A gagne retourn Moris,enn parmi bann rezon seki se bann gro konpayi depi Moris ki gayn kontra pou fer travay pou kont R.R.A et ki zot profi pa reinvesti dan Rodrig. 

Dan lepok ti enan  enn gro problem somaz dan Moris guvernman Moris ti pran desizyon pou kre D.W.C [development work corporation] par rekrit bann somer ki konn metye ek donn zot enn travay dirab ek an mem  tan  asire ki D.W.C gayn sifizaman  kontra pou li respekte so langazman  anver so  bann anplwaye .kan ti enan problem lozman dan Moris zot  ti kre C.H.A[central housing authority]pou atak sa problem la dan enn fason dirab ek an mem tan kre travay permanan pou bann somer.Sa politik ekonomik la inn permet regle plizyer gro problem ki sosyete Moris ti pe fer fass sa lepok la kuman lozman pu dimunn mizer,travay pou bann somer ek sulazman lamizer. 

Nou pa ape dir ki Guvernman Rezyonal bizin adopte exakteman seki Guvernman Moris ti fer a lepok kot li ti pa fer fass a preske mem kalite problem .me nou dir ki Guvernman Rezyonal enan le devwar pou truv bann moyen efikas avek ti bidze ki li gagne la pou servi li efikasman pou regle bann gro problem kuman somaz ek lamizer dan enn fason dirab.Nou kwar ki se sa rol enn Guvernman responsab pou itiliz tou mwayin a so dispozisyon pou  eliminn somaz a traver kreasyon  bann travay . 

Dan ka Rodrig kot sekter prive kreatif danplwa kwazi inekzistan ki sann la pou fer li si Guvernman pa asim so responsabilite ?lefet ki dan ka Rodrig somaz li enn de pli gran koz lamizer, nou kwar ki se rol Guvernman Rezyonal pou pran bann mezir ki bizin pou asir enn travay desan ek dirab a tou bann Rodriguais ki bizin enn travay pou viv.Solisyon li sertennman pa par al rod travay dan Moris pou nou bann zenn .li pa non plu kreasyon bann konpayni pou pran plas sekter piblik . me se enn vre politik danplwa ki bizin, kot lanplwa  dirab vinn o sant tou proze devlopman. 

Kan nou get  kantite pos travay inn kre dan dernye bidze pou sekter piblik dan Moris , kan nou get ki vitess bann pos vakan pe ranpli dan sekter piblik Moris ,kan nou mazine ki sekter piblik Moris pli byin striktire, pli byin ekipe an term personel ek lor  tou lezot plan  ki fonksyon piblik Rodrig ek sirtou ki dan Moris enan enn sekter prive solid ki kreater lanlwa, nou pa konpran kifer dan Rodrig kot enan enn to somaz byin ot ,kot pena enn sekter prive kreater lanplwa ,kot nou sekter piblik pre pou kolaps akoz enan enn mank personel a tou nivo ,koman kapav enan pre de mil[2000] pos ki vakan et ki preske mem pa poigne  pos  finn kre dan sa dernye bidze la.pa finn mem fer provizyon pou kapav ranpli bann pos ki P.R.B finn rekomande pou kre. 

Dan sa kondisyon la kuman nou kapav dir ki Guvernman Rezyonal enan  a ker problem somaz ek lamizer ki pe fer ravaz dan Rodrig .zot dir ou bizin kre zis travay prodiktif on dire enn sosyeye pou fonksyonn zis ek travay prodiktif .zot napa koz travay itil ki kapav kre par ranpli sa bann pos ki vakan la,ki an mem tan kapav permet pous nou devlopman delavan ,sa bann travayer manyel kuman labourer la  kapav donn enn gran kudme dan devlopman lagrikiltir sirtou pou ogmant prodiksyon agrikol ek lelvaz ,zot kapav aide dan kad proteksyon ek prezervazyon lanvironnman ek byin itil parski si guvernman pa enan moyen pou devlop lagrikiltir par examp ki pou fer li ,sekter prive? 

Guvernman Rezyonal pa kapav zis swiv politik ekonomik Moris ou ayer kot pe fer degresaz dan servis piblik ,kot pe pratik seki zot apel jobless growth ,parski nou realite pa parey,Rodrig napa enn sosyete kapitalis,pa kapav nek aplik tou politik k ipe aplike Moris ek ayer san pran an konsiderasyon nou realite. 

Konpayni ki lasanble Rezyonal pe kre a gos a drwat  finn montre so limit an term kreasyon lanplwa dirab,donn tou kontra bann gro konpayni pou fer seki zot apel devlopman[ka .J.Maurel enn lexamp resan] ,ti antrepriz inn montre so limit an term  kreasyon travay dirab,sekter artisanal  ,sekter turisinn montre zot  limit,.Zis sekter piblik valer dizur ki kapav azir kuman enn vre kreater travay dirab par ranpli tou sa bann pos vakan [si enan bann pos ladan ki bizin restyle pou zot reponn a sitiasyon prezan kapav fer li].Avek sa maindev la nou sir ki Guvernman Rezyonal  pou enan moyen an term maindev pou antam bann gran proze devlopman . 

 

Nou revandikasyon li byin simp; nou enan konviksyon ki li rol tou Gouvernman responsab pou asire ki tou dimoune ki bizin enn travay pou viv kapav gayn enn travay et kan nou dir travay nou pe koz travay desan ek dirab pa zafer bat bat enn ti zurne par si enn ti zurne par la, me enn travay kot enan sekirite danplwa .Alor nou pe demann Guvernman Rezyonal si li vremem anvi regle problem somaz li komans par seki li kapav fer limem .setadir ranpli sa bann poste ki aktyelman vakan la  ,ladan enan plis ki 700 pos labourer ki si ranpli  zot sa  kapav kontribye dan devlopman lagrkiltir ,lelvaz , proteksyon ek prezervasyon lanvironnman. 

Ki Guvernman Rezyonal kre bann striktir solid [ pa sa bann konpayni ki pe kre a gos a drwat  la] pou permet rekritman bann travayer avek metye pou okip devlopman infrastriktir sosyal ek piblik. , sa li an adisyon avek  lezot travay ki Guvernman Rezyonal enan plan pou kre, bann travay dan sekter prive,  turis ek artisanal. 

Guvernman Rezyonal bizin enn respe pou nou bann somer fode pa tret zot koman bann mandian ki pe bizin zir zot alezans pou gayn enn travay. 

 

Peser ek proteksyon lagon 

Li enn realite ki enan enn sirexplwatasyon lagon parski enan depli an pli peser ki pe explwat lagon la pou plizyer rezon , me prinsipalman akoz problem somaz.bokou dimoune ki penan travay truv lapes kuman sel moyen pou enan enn reveni pou zot kapav viv ek fer  viv zot fami. Nou panse ki enan plis peser profesyonel ki penan  kart peser ki bann ki  finn enan privilez gayn sa kart la.,enan osi bann seki nou apel bann roder kari ki malgre ki zot pa depann lor lapes pou gayn zot lavi me lapes permet zot arondi zot bidze sirtou ki zot pa bizin aste pwason ,ki nou bizin pa bliye dan tou nou bann analiz  res enn de bann principal surs protein bann abitan Rodrig. 

Kan pwason vinn inaksesib pou bann dimunn mizer parski li finn vinn ser ek rar an mem tan sa enan enn lefe nefas lor labitid alimanter bann Rodriguais ek zot lasante.Tousala pou dir ki bizin pran boku zafer an konsiderasyon avan ki pran bann desizyon lo sa size la. 

Li paret ki enan lavenir dan  lapes hor lagon me nou panse ki malgre formasyon ki bann peser pe gane pou al lapes or lagon li  pa sifizan parski pli gro problem seki bann anbarkasyon ki zot posede la pa permet zot  rantabiliz sa kalite lapes la parski avek zot anbarkasyon ase rar zot kapav avantir zot an ot mer ,la usi zot pa kapav avantir zot tro lwin ek brizan ek zot pa kapav al lor bann rado ubyin dan bann zonn kot vreman enan pwason. 

Suvan arrive ki sa bann peser la pa mem kuver zot fre lesans.aktyelman selman bann bato ki fer lapes o gro  ek bann bato konpayniRodrigues Seafood Company ltd ki  kapav explwat bann rado ek rantabiliz zot aktivite. 

Nou pe remarke ki avek devlopman turis enan lezot aktivite ki enan lien ek  touris pe devlope dan nou lagon par bann operater turistik prinsipalman,bann spor ek lwazir akwatik ki inklir bann zil dan lagon.Enan osi problem explwaiasyon barbara ki malgre bann proestasyon Guvernman Rezyonal ti akord permi pou so explwatasyon.zordi malgre li interdi nou okuran ki lip e kontiyn explwate ilegalman ,nou truv sa byin drol kuman so exportasyon pe fer ver Moris parski dimoune dan Rodrig pa konsom li. 

Sirexplwatasyon lagon li pa enn zafer nuvo ,a plizyer repriz dan nou listwar, Rodrig inn fer fas a sa problem la ek finn bizin pran bann mezir pou diminye presyon lor lagon.Ki politik Guvernman Rezyonal divan sa sitiasyon la zordi? 

1.Ranforsi proteksyon lagon par ranforsi control lor lapes illegal avek kreasyon enn flying squad sou responsabilite Departmental Head Fisheries. 

2.vinn avek bann mezir finansye pou insit bann proprieter permi grand senn pou rann zot permi. 

3.vinn avek bann mezir finansye pou insit bann peser ki enan plis ki 50 an rann zot kart peser kont enn som ki tourn otur 40 mil rupi. 

4.Donn formasyon bann peser pou permet zot al lapes hor lagon ek donn zot kart hor lagon tanporer . 

5.Ankuraz bann bato lapes dan Moris pou vinn pran peser Rodrig pou al lapes lor ban . 

6.Donn formasyon skipper sertin bann peser pou zot kapav travay dan sekter turistik. 

7 .Kreasyon bann reserve marin , park marin  etc pou protez lagon. 

8.devlop bann nuvo kriter pou donn kart peser. 

Kifer nou kritik  sertin bann mezir ki Guvernman Rezyonal inn pran pou regle sa sitiasyon la? 

Premyerman bokou sa bann mezir drastic la pe pran swadizan dan lintere peser  me san okenn form konsiltasyon serye avek zot, 

 Dezyemman , paret ki guvernman Rezyonal pe opte pou retir peser dan lagon san okenn plan rekonversyon serye.nou tou dakor ki zame pou kapav devlop okenn aktivite mem le pli artisanal posib avek enn capital ki parfwa mwins ki rs20,000 rupi ,sirtou ki nou tou kone ki tou sa bann peser la enan bann det. 

Trwazyemman, enn Guvernman ki dir li responsab pa kapav donn preseans proteksyon lagon o detriman lavi peser .pa kapav pass lalwa pou pran enn gran parti champ operasyon bann peser pou fer rezerv, kot otomatikman zot reveni pou diminye san okenn form konpansasyon pou sa pert ki zot otomatikman pou fer fas la. 

Nou kapav dir de par fason azir Gvernman Rezyonal , bienet pwason ek koray  enan plis linportans ki lavi peser ek zot fami.pa kapav dan sertin ka pe rod fer lagon vinn exklisivman  pou bienet touris ek pa pran an konsiderasyon sa bann peser ki pe perdi zot terin travayla  san okenn travay alternative, ni mem enn posibilite travay dan sa bann aktivite pou turis .Sa ekivo a enn exklizyon total bann peser depi lagon pou plezir turis .ankor enn fwa nou gayn linpresyon ki bienet touris plis inportan ki lavi peser ek zot fami . 

Dapre seki nou finn konstate boku sa bann peser ki finn rann zot kart ankor pe pratik zot aktivite peser avek sel diferans zot pa enan okenn kart peser,seki vedir ki sa politik pou rann kart peser kont enn som larzan la pa finn otomatikman amenn enn rediksyon presyon lor lagon lekontrer kapav pli vre.Malgre tou bann mezir ki pe  pran dan sa sekter la, nou konstate ki sel rezilta ki finn gagne ziska ler se enn deteryorasyon kondisyon de vie  bann peser. 

Nou bann revandikasyon li byin kler ek rezonab; 

Tou proze proteksyon ek prezervasyon nou lagon pa kapav met an pratik ek vinn viab san bann vre konsiltasyon avek peser  parski an kelke sort zot ki propieter nou lagon ,pa R.R.A,pa fisheries,pa responsab park marin ankor mwin bann turis.fodre konsantman ek enn sutyin total peser pou sa kapav realize .represyon tusel pa pou amenn gran zafer. 

Exklizyon peser depi lagon san enn plan rekonversyon kredib pa pou amenn sanzman ki nou swete. 

Donn kart peser deor bann peser ki pe lapes dan lagon pou al lapes hor lagon pa pou sanz narnyin si zot pa posed bann bato apropriye ki kapav permet zot lapes dan bann kondisyon kot pou enan enn rantabilite zot aktivite. 

Lagon pa kapav vinn a izaz exklizif turis,san  ki pran an konsiderasyon kuman bann fami Rodriguais pou aprovizyonn zot an pwason ki zot  surs protein principal ,san ki nou asir enn travay alternatif pou sa bann peser la. 

Pa kapav sakrifye peser ek so fami dan kad enn proze pou protez lagon ek rezerv enn gran parti pou  aktivite turistik. 

Peser bizin o sant tou sanzman ki pou fer dan sekter lapes ek dan zesyon resurs lagon ek tou nuvo proze devlopman  ou aktivite ki enan lyin ek lamer sirtou lagon. 

Nou demann ki bizin enan bann vre konsiltasyon avek kominote peser avan ki pran bann desizyon ki pou enan enn linpak kelkonk  lor zot lavi . 

Bizin zel bann desizyon ki finn inpoz lor peser a traver bann regleman ek uver bann vre konsiltasyon avek komiinote peser pou ki zot pa vinn bann victim dan kad plitik Guvernman Rezyonal pou sekter lapes . 

Bizin ki tou bann peser ki pe opte pou al lapes hor lagon gayn enn kart ki permet zot lapes osi byin dan lagon ek hor lagon kuman fer dan Moris, ziska tou bann kondisyon reyni pou permet zot rantabiliz pratik lapes hor lagon. 

Bizin fini deside kuman popilasyon pou aprovizyonn li an pwason a enn pri rezonab avan ki nou pou pans pou exklir peser depi lagon . 

Bizin enan plis rasyonalite dan alokasyon kart peser. 

Bizin ki peser ek so fami pa sakrifye o detriman proteksyon ek prezervasyon lagon. 

Lefet ki nou kone rezon deryer sirexplwatasyon lagon  li an gran parti akoz somaz ,nou demann enn gran proze rekonversyon  peser dan bann anplwa alternative ek dirab y konpri bann anplwa dan sekter piblik  pou ki nou kapav regle problem la dan enn fason dirab. 

Bizin ki Guvernman Rezyonal pran bann mezir ki bizin pou anpes exportasyon illegal barbara ver Moris si vre mem li anvi konbat explwatasyon illegal barbara. 

Bizin konpans bann peser kan pe pran bann desizyon kuman fer rezerv marin pou mank a gagne ki zot sibir. 

Bizin ki R.R.A komandit enn letid pou gete eski bann peser kapav viv enn lavi desan avek aktivite ki zot pratike plis alokasyon ki sertin benefisye. 

 

Lagrikiltir ek Lelvaz 

Enan bann bon inisyativ ki finn pran par komisyon ki okip lagrikiltir ek lelvaz me   enan  osi bann  desizyon inportan ki finn pran san ki finn enan konsiltasyon avek bann elver ek planter ki afekte par sa bann desizyon la.Pa kapav pran bann desizyon san bann vre konsiltasyon ki pou enan bann linpak brital lor fason ki pratik lagrikiltir ek lelvaz in pratike depi plizyer zenerasyon , san ki nou fer enn konsta lor  ki linpak sa bann sanzman la pou  enan lor kondisyon ek kalite lavi sa bann bann planter ek elver. 

Komisyon lagrikiltir pa kapav ekzekit bann travay kuman fens bann terrain dimoune,fens bann rezerv,ubyin amenaz bann zonn agrkol par bann kontraktyel parski ki sann la pou asir zot lantretyin ek zot reparasyon apre ki kontrakter inn fini terminn so kontra. 

Nou revandikasyon principal seki bizin ki tou sanzman dan sekter lagrikiltir ek lelvaz fer an konsiltasyon ek  konsantman  bann konserne.Nou panse ki si nou pe viz enn ogmantasyon prodiksyon lagrikiltir ek lelvaz ,bizin ki komisyon la enan moyen aproprye  an term maindev ek finans pou atenn sa lobzektif la. 

Bann finansman depi bann diferan funds kuman food security fund etc bizin integre bidze lagrikiltir kumsa kapav permet kreasyon bann travay dirab ek permet ki enan moyen finansye pou akonpayn bann planter ek elver,parski li kler ki si komisyon lagrikiltir  pa aid bann planter ek elver pou amelyor zot prodiksyon, kisannla pou fer li? 

 

LEPOR 

Lepor ki enn sekter inportan pe oper dan bann kondisyon byin deplorab .Enan diferan operater ki aktif dan leporkot  enan diferan kategori travayer ki  fer diferan travay,  enan ki travay avek Mauritius Port Authority ,enan avek R.R.A,enan avek konpanyi P.A.P.O.L,enan avek S.T.C. 

Parmi sa bann travayer la enan buku ki pe explwate san ki R.R.A pran bann desizyon pou regle sa bann explwatasyon la .Bann travayer ki pe fer travay pou S.T.C depi plis ki 20 an pankor resi regilariz zot lanplwa vizavi S.T.C.Bann travayer konpayni P.A.P.O.L usi pe milite pou kreasyon enn trust pou regle sertin de zot bann problem .Bann travayer Marine Services pe fer travay pou M.P.A  san ki zot anplwaye anplwaye par M.P.A ek san okenn renimerasyon apropriye. 

Nou damande a seki Guvernman Rezyonal akord enn latansyon spesyal a sitiasyon dan lepor ek akord so sutyin ek pran bann mezir a so dispozisyon pou sutenir revandikasyon sa bann travayer la pou permet ki zot drwa respekte ek amenn enn amelyorasyon dan sa sekter inportan la. 

 

Touris 

Sekter touris ki sipoze enn de bann sekter pli inportan nou lekonomi finn fer fas a bokou difikilte dernyerman ,kot guvernman santral ek gouvernman rezyonal finn bizin adopte bann mezir pou permet ki sekter la kontiyn roule ek ki travayer pa perdi zot travay.Malgre ki finn pran bann mezir kuman rediksyon pri biye avyon pou bann touris, diminye  fees pou bay later.Nou konstate ki travayer sa sekter la pe ankor perdi travay ,pa finn enan amelyorasyon zot kondisyon travay pou bokou bann travayer sa sekter la. 

 

 

Nou pe demande a seki Guvernman Rezyonal pran an konsiderasyon kondisyon travay dan sa sekter la et veye a seki zefor ki Gouvrnman pe fer pou sutenir sa sekter la pe atenn lobzektif ki finn fixe ,parmi ki pa enan bann lisansiman. 

 

 

 

Demokrasi lokal ek sosyete sivil 

 

Demokrasi local dan form Rodrigues Council of Socisl Services[R.C.S.S] avek komite vilaz finn zwe enn rol inportan dan nou sosyete, li enn form demokrasi ki inplante dan nou sosyete e ki finn permet nou sosyete fonksyonn lor enn bon baz. 

Enan bokou bann O.N.G dan Rodrig ki pe azir lor terin pou permet amelyor sitiasyon dan nou pei lor diferan fron, bokou sa bann travay la pe fer lor enn baz  volonter . 

Dan enn lot kote nou enan bann syndika ki  pe milite pou amelyor kondisyon de vi bann travayer ek zot fami. 

Nou panse ki tou sala inportan pou bon fonksyonnman nou sosyete ek zot merit gayn respe Guvernman Rezyonal . 

Depi impe letan nou remarke ki ase souvan sa bann lorganizasyon la ek zot bann animater victim bann kritik ek latak inzistifye depi Guvernman Rezyonal.Kan zot pa fer zot travay byin zot zet blam lor sa bann lorganizasyon la . 

Enan bann reform ki Guvernman Rezyonal ek Guvernman Moris pe enan lintensyon amene lor plan demokrasi local dan Rodrig. 

Nou demande a seki Guvernman Rezyonal  enan plis respe vizavi bann O.N.G ek lezot bann lorganizasyon sosyal kuman bann syndika ,ki enan kom misyon ameliorasyon kondisyon de vi bann dimoune ki pe viv dan Rodrig. 

Bizin enan bann vre konsiltasyon avan ki ninport ki reform ki pou fer  lor zafer demokrasi local ,nou pa pou permet ki vinn inpoz ninport ki model demokrasi lor nou sosyete. 

 

konklizyon 

Pou konklir nou ti anvi fer resortir ki sa bann revandikasyon ek kritik ki nou finn fer la li pa totalite nou bann kritik ek revandikasyon a Guvernman Rezyonal , parski nou ena lezot bann  kritik ek revandikasyon.Nou finn mansyonn plito  bann zafer ki preokip nou dan limedia . 

Nou osi anvi dir ki pa akoz nou pe fer sa bann kritik la ki nou konsidere ki  Guvernman Rezyonal pa pe fe narnyin  ou pa finn fer narnyin de bon ,nou rekonet ki enan kitsoz pe fer ek finn fer  ki korek me an mem tan nou pe dir ki  si ti fer bann kitsoz  ki bizin ek  kuman bizin, dan kad ki bizin nou pa ti pou bizin fer sa  bann revandikasyon ek kritik ki nou pe fer zordi la 

Nou konn responsabilite Guvernman Moris dan bann difikilte ki nou pe fer fas et pou sa nou pou adress li  nou bann kritik ek revandikasyon.Anfin nou anvi dir osi ki nou bann revandikasyon ek kritik si li gayn konsiderasyon ki bizin  li pa pou permet regle tou bann problem ki nou sosyete pe fer fas me nou sir ki li pou amen bann amelyorasyon  dan nou sosyete ek pous nou pei  al ver progre. 

 

Mai 2010 

 

 

 

Fil RSS 2.0. Vous pouvez laisser une réponse.